ಸೂಜಿ ಸುಬ್ಬ ರಾಯನ ಕಥೆ
"ಅಜ್ಜಿ ! ಕಥೆ ಓದೋಣಾ ?" ಅಜ್ಜಿಯ ಬಳಿ ಅಚ್ಚುಕಟ್ಟಾಗಿ ಬಂದು ಕುಳಿತಳು ಪುಟ್ಟಿ .
" ತಿಂಡಿ ತಿಂದ್ಯ?"
" ಹಮ್ ! ಆಯ್ತು !"
" ಪಾಠ ಮುಗ್ಸಿದ್ಯಾ ?"
" ಓ ! ಆಗ್ಲೇ ಮುಗೀತು !"
" ಅರೆ ! ಏನಿವತ್ತು , ಇಷ್ಟ್ ಬೇಗ ಎಲ್ಲ ಮುಗ್ಸಿದ್ದೀ ?" ಅಜ್ಜಿಗೆ ಆಶ್ಚರ್ಯ.
" ಇನ್ನೇನು ? ನಿನ್ ಕಥೆ ಮುಂದ್ವರಿಸ್ಬೇಕಲ್ಲಾ ?" ಎಂದ ತಾತ ತಾನೂ ಅಲ್ಲೇ ಕುಳಿತರು .
" ಸರಿ ಮತ್ತೆ ! ಎಲ್ರೂ ತಯಾರ್ ಅಂದ್ರೆ ನಾನೂ ರೆಡೀನೆ. " ಎಂದ ಅಜ್ಜಿ ಪುಟ್ಟಿಯಿಂದ ಪುಸ್ತಕ ಕೈಗೆ ತೆಗೆದುಕೊಂಡಳು .
" ಅಜ್ಜಿ ಅಜ್ಜಿ ! ಇರು ! ನಾನೂ ಬಂದೆ!" ಪುಟ್ಟಣ್ಣನೂ ಬಿರ ಬಿರನೆ ಬಂದು ಕುಳಿತ.
ಅಜ್ಜಿ ಮುಂದಿನ ಕಥೆ ಓದ ತೊಡಗಿದಳು .
೬
ಯೋಚಿಸಿ ನೋಡಿದ ಹುಲಿಯಣ್ಣ
ಹೋಗಲು ಬಿಟ್ಟಿತು ಸುಬ್ಬರಾಯನನ್ನಾ !
''ಕಾಡಲ್ಲೇ ಕಾಯುವೆ ನಿನಗಾಗಿ,
ಮರೆಯದೆ ತಾ ವಡೆ ನನಗಾಗಿ !"
''ಕಂಡಿತ ತರುವೆ ಹುಲಿಯಣ್ಣಾ !"
ಎನ್ನುತ ಕುಣಿದೋಡಿದ ಸೂಜಿ ಸುಬ್ಬಣ್ಣಾ !
೭
ಜುಳು ಜುಳು ಹರಿದಿತ್ತು ಹೊಳೆಯೊಂದು,
ಹಟಾತ್ತನೆ ಹೊರಬಿತ್ತು ಮಕರವೊಂದು !
" ಯಾರದು ಹೊಳೆಯತ್ತ ಬಂದಿರುವೆ ?
ನಾನೀಗ ನಿನ್ನನು ಕಬಳಿಸುವೆ !"
೮
ನಗು ಮುಖದಿಂದ ಅಂಜದ ಜಾಣನು
ನಾನೇ ಸೂಜಿ ಸುಬ್ಬ ರಾಯನೆಂದನು !
" ಅಜ್ಜಿ ನನಗಾಗಿ ಕಾದಿರುವಳು,
ಕಜ್ಜಾಯ ಉಸ್ಲಿ ಕಡುನಗುಬು ಮಾಡಿರುವಳು!
ಮೊಸಳೆ ಅಣ್ಣ ನನ್ನನ್ನೀಗ ತಿನ್ನದಿರು.
ತಿಂದು ಕೊಬ್ಬಿ ಬರುವ ನನ್ನ ಕಾಯುತಿರು!
ಈ 'ಸೂಜಿ' ನೀನೀಗ ಕಬಳಿಸಿದ್ರೆ,
ಗಂಟಲಿಗೆ ಚುಚ್ಚಿಕೊಂಡು ಬಲು ತೊಂದರೆ !"
ಯೋಚನೆ ಮೆಚ್ಚಿದ ಮೊಸಳೆ ಅಣ್ಣಾ
ಹೋಗಲು ಬಿಟ್ಟಿತು ಸುಬ್ಬ ರಾಯನನ್ನಾ !
" ಕಡುಬೊಂದು ತಂದು ಬಿಡು ನನಗಾಗಿ ,
ಹೊಳೆಯಲ್ಲೇ ಕಾದಿರುವೆ ನಿನಗಾಗಿ !"
"ಕಂಡಿತ ತರುವೇ ಮೊಸಳೆಯಣ್ಣಾ !"
ಎನ್ನುತ ಜಿಗಿದೋಡಿದ ಸೂಜಿ ಸುಬ್ಬಣ್ಣಾ !
"ಆಮೇಲೇನಾಯಿತು ಅಜ್ಜಿ ?"
" ಆಮೇಲೆ ಸಶೇಷ !" ನಗತ್ತ ನುಡಿದು ಎದ್ದಳು ಅಜ್ಜಿ .
No comments:
Post a Comment